Naligid na ang Dakung Bato (Sabado Gloria B)

NALIGID NA ANG DAKUNG BATO nga nagsira sa ganghaan sa lubnganan ni Jesus! Mao kini ang naabtan sa mga kababayen-an nga buot modihog og pahumot sa patayng lawas sa atong Ginoo sayo kaayo sa buntag sa Domingo (Mk. 16:1-7). Ug matud sa batan-ong lalaki nga naglingkod sa sulod sa lubnganan ug nasul-ob og taas nga puting sapot, wala na si Jesus didto—NABANHAW SIYA! Nalisang sila… kay wala pa sila makasabot.  Apan kita nga nakasabot…  mosinggit sa dakung kalipay… ALELUYA! BUHI ANG ATONG GINOO! ALELUYA!

Naligid na ang dakung bato… busa migitib na ang kahayag nga maoy naghingilin sa kangitngit. Kining gabhiona maoy “mother of all vigils.” Pagtukaw sa katawhan sa Dios nga nangandoy sa kaluwasan gikan sa kangitngit sa kasal-anan. Busa nagsugod ang atong liturhiya sa pagbendita sa kalayo ug pagdagkot sa kandila sa pasko nga nagsimbolo sa kahayag ni Kristo.

Ang kamatayon ni Kristo sa Krus maoy labing mangitngit nga samputanan sa kasal-anan sa tawo. Ang Biernes Santo daw kadaugan sa pwersa sa kangitngitan. Apan, sa ikatulong adlaw gikan sa iyang kamatayon, si Kristo midaug batok sa gahum sa sala ug kamatayon. Ang iyang pagkabanhaw usa ka mahimayaong kahayag nga mipapas sa kangitngit sa atong kasingkasing ug hunahuna. Si Kristo ang kahayag!

Mga igsoon, dinagkutan ang atong kandila misulod kita sa Simbahan kay kita nakaambit man sa kahayag ni Kristo. Karong gabhiona, gihinunduman ta nga dili na kita katawhan nga nagtago nga mahadlokon sa kangitngit. Kita nahimo na nga mga anak sa kahayag… katawhan sa kahayag… pinaagi ni Kristo. Busa magpuyo kita sa kahayag. Talikdan ta ang tanang mga anino sa pagpakasala ug pasudlon ta sa atong kasingkasing ang kahayag ni Kristo.

Naligid na ang dakung bato… busa paminawon ta ang kasaysayan sa katumanan sa saad sa Dios. Ang dakung laraw sa Dios mao man ang pagdala sa kaluwasan alang sa katawhan nga napukan. Niining gabii sa pagtukaw, taas ang mga basahon kay kini nagsaysay sa katingalahang buhat sa Dios diha sa pagpangluwas. Naminaw kita, una sa tanan, sa istorya sa pagbuhat sa Dios sa kalibutan, sa istorya sa sakripisyo ni Abraham ug ang saad sa Dios ngadto kaniya nga amahan sa pagtoo; naminaw kita sa makahingangha nga sugilanon sa kalingkawasan  sa katawhang Israel gikan sa kaulipnan sa Ehipto. Ug nagpadayon ang atong pagpaminaw sa istorya sa pag-atiman sa Dios sa iyang katawhang masupilon ug sa iyang saad sa kaluwasan pinaagi sa mga propeta.

Ug labaw sa tanan, niining gabhiona, gipaminaw ta ang katumanan niining tanang saad ug laraw sa Dios sa pagpangluwas! Si Kristo nga atong manluluwas nga namatay sa Krus nabanhaw gikan sa mga minatay! Naligid na ang dakung bato nga mitabon sa ganghaan sa lubnganan ni Jesus! Nalugti na ang tanikala sa kaulipnan sa sala. Ang katawhan nga giluwas sa Dios diha ni Kristo gawasnon na. Ang kamatayon gibuntog ni Jesus; wala nay gahom ang kamatayon kaniya (Rom 6:9). Busa ang katawhan sa Dios angay nga magmaya diha sa gasa sa kinabuhing dayon!  ALELUYA!

Mga igsoon, ang Dios matinumanon sa iyang saad. Matinud-anon ba kita ngadto kaniya? Hinumduman ta kanunay ug baliklantawon nato ang kaayo sa Dios nganhi kanato. Daygon ta’g pasalamatan Siya.

Naligid na ang dakung bato… busa nabuntog na ang kamatayon ug diha sa bunyag magkawos kita sa tubig sa kinabuhing dayon. Niining gabhiona sa pagtukaw, dinagkotan ang mga kandila, bag-ohon ta ang atong mga panumpa sa atong bunyag. Ug lagmit aduna kita’y giandam nga mga kaigsoonan nga pagabunyagan. Gipahinumduman kita niining liturhiya sa pinakadakung gasa nga atong nadawat tungod sa pagpangluwas sa Dios pinaagi ni Kristo—ug kini ang gasa sa bag-ong kinabuhi.

Diha sa bunyag nahiusa kita sa kamatayon ni Kristo; ug tungod niini mabanhaw pud kita uban kaniya. Diha sa ikaduhang basahon (Rm 6:3-11), tataw ang pagpasabot ni San Pablo: “Nasayod kamo nga sa pagbunyag kanato nahiusa kita kang Kristo Jesus, ug busa nahiusa kita sa iyang kamatayon? Tungod niini, sa pagbunyag kanato gilubong kita uban kaniya ug miambit sa iyang kamatayon, aron ingon nga si Kristo gibanhaw sa mahimayaong gahom sa Amahan, kita usab magpuyo diha sa bag-ong kinabuhi” (v.3-4).

Bag-ong kinabuhi! Wala nay mas dakung gasa kaysa niini. Ang daan tang kinabuhi sa pagpakasala patay na hiniusa sa kamatayon ni Kristo. Buhi kita karon tungod ni Kristo ug kining atong kinabuhi dili na alang sa pagpakasala kondili alang sa Dios.

Mga igsoon, sublion ta ang atong mga panaad diha sa bunyag nga puno sa pagpasalamat. Pangayoon ta usab ang grasya nga atong maampingan ang kahamili sa atong bag-ong kinabuhi diha sa bunyag. Talikdan ta ang pagpakasala ug magkinabuhi kita nga makapahimuot sa atong mahigugmaong Dios nga nagluwas kanato.

Naligid na ang dakung bato busa wagtangon ta’ng kalisang, puy-an ta nga malipayon ang kabag-o sa kinabuhing kristohanon ug manlakaw kita nga maisogong nagasugilon sa Maayong Balita---ALELUYA! BUHI ANG ATONG GINOO! ALELUYA!